​A exposición 'Vía Iacobitana' sobre o Camiño recala en Ribadeo

Abreu as súas portas en Ribadeo a exposición itinerante Vía Iacobitana, unha mostra fotográfica sobre o Camiño de Santiago. Patrocinada por Viaqua en colaboración coa Axencia Turismo de Galicia e o Xacobeo, amosa o Camiño desde unha perspectiva artística contemporánea, realizada por fotógrafos galegos que se converteron en peregrinos para plasmar a súa particular visión e as sensacións que lles suxire a Ruta Xacobea. Logo de pechar as súas portas con éxito de público en Santiago de Compostela recala en Ribadeo e tamén percorrerá ata o próximo mes de decembro as cidades de Ourense, Pontevedra, e as localidades de Valdoviño, Viveiro e Fene.

A través das imaxes recompiladas podense contemplar diversos itinerarios en diferentes épocas do ano, as súas variadas paisaxes, os romeiros, os veciños e o patrimonio cultural que atesouran desde a óptica persoal de cada autor, que lle imprime personalidade.

Viaqua destaca con esta colaboración coas institucións a vontade da empresa de cooperar "tamén na promoción e apoio da cultura, achegándoa a toda a sociedade e poñendo en valor, neste caso, o traballo de grandes profesionais galegos da imaxe".

O xerente do Xacobeo, Rafael Sánchez, xunto co responsable da Zona Norte de Viaqua, Luis Morón, e os concelleiros de Cultura e de Turismo do Concello, asistiron á apertura da exposición na Capela da Orde Terceira Franciscana que cedeu o espazo e na que permanecerá aberta ao público de luns a domingo en horario de 10.00 a 20.00 horas, ata o vindeiro 7 de agosto.