​Arde unha embarcación na Ría de Betanzos e os seus tripulantes teñen que saltar á auga

Dúas persoas conseguiron salvarse das chamas que calcinaron por completo unha embarcación de recreo. En concreto, o suceso produciuse ás 10,15 horas deste sábado na Ría de Betanzos (A Coruña), entre Illa Carbón e Illa Carboeira.

A tripulación puido saltar á auga e poñerse a salvo, pois outras embarcacións que navegaban pola zona recolleron aos afectados e leváronos a terra. Por fortuna, atópanse en perfecto estado de saúde.

Segundo explicaron aos servizos de emerxencias, o lume comezou no motor e arrasou por completo a embarcación, unha lancha duns sete metros de eslora. En concreto, atopábanse na zona practicando mergullo cando, de súpeto, estourou o motor e comezou a arder.

Unha persoa particular chamou ao 112 Galicia para pedir axuda. De inmediato, o persoal do Centro de Atención ás Emerxencias solicitou a colaboración de Salvamento Marítimo, o Servizo de Gardacostas de Galicia, axentes de seguridade e voluntarios de Protección Civil de Miño, Sada e Pontedeume.