Clamor da comunidade educativa contra as 'reválidas' e a LOMCE

Centos de alumnos percorreron as principais cidades galegas na segunda xornada de folga educativa convocada este curso para esixir a supresión das 'reválidas' e a derrogación da Lei Orgánica de Mellora Educativa (LOMCE).

Nesta ocasión, ademais dun paro en todo o Estado impulsado polo Sindicato de Estudantes, en Galicia chamaron á folga as organizacións de alumnos 'Erguer!', Alaga e Acción Universitaria, que celebraron protestas en 16 localidades.

A capital galega acolleu unha das principais protestas, pero tamén unha marcha dispersa, na que varios centenares de mozos (apoiados por Anpas Galicia e a Plataforma Galega en Defensa do Ensino) saíron da Alameda compostelá pasados 20 minutos do mediodía.

Os primeiros foron os seguidores do Sindicato de Estudantes (SE), portando unha pancarta na que se podía ler 'Non ás reválidas franquistas'.

Minutos despois arrincaba o grupo máis numeroso de manifestantes, o das organizacións de alumnos galegas, encabezados pola pancarta co lema 'O estudantado galego contra a LOMCE e as reválidas' e que mantiveron a distancia respecto ao SE durante todo o percorrido.

Ademais de entidades como Anpas Galicia, ou a plataforma na que participan a CIG-Ensino, entre outros, os mozos recibiron o apoio de representantes políticos como Antón Sánchez e Luca Chao, de En Marea, ou Ana Pontón e Xosé Luís Rivas 'Mini', do BNG.

CONTRA AS "MENTIRAS" DO PP

En declaracións aos medios, a portavoz do sindicato de alumnos Erguer!, Iria Figueroa, destacou o seguimento da convocatoria de folga que, segundo os datos provisionais que manexa, está secundada polo 90 por cento do alumnado de ensino medio e bacharelato.

Figueroa reprochou ao goberno popular as súas "mentiras" respecto das 'reválidas', realizando declaracións "que daban a entender que se terminaban", e "lexislando en sentido contrario", unha dobre vara de medir que veñen denunciando os estudantes desde que o goberno anunciara a paralización da norma. "Por tanto, non temos outro camiño que non sexa a mobilización", sinalou.

A continuación, instou á Xunta e ao Goberno do Estado a que "acepte dunha vez" o "clamor unánime contra as 'reválidas' e a Lomce", reprochando o "engano e a farsa" articulada ao redor do decreto lei que aprobarán o próximo 28 de novembro, polo que suspenderán temporalmente os efectos académicos destas probas.

OUTRAS CIDADES

As protestas de alumnos estendéronse ao longo de 16 localidades de toda Galicia.

En Vigo, centos de estudantes saíron de Praza América con puntualidade, nunha marcha na que se corearon consignas e portaron pancartas con lemas como 'Fóra reválidas franquistas' e 'En defensa do ensino público'.

APOIO DE REPRESENTANTES POLÍTICOS

A deputada de En Marea Luca Chao cualificou este xoves como "impresentable" que os alumnos galegos non saiban aínda "de que van examinarse" e pediu "botar abaixo" a LOMCE.

Así, criticou a LOMCE por ser unha lei "segregadora, elitista" e que "vai en contra da igualdade de oportunidades" e atenta "contra os principios pedagóxicos básicos". "Estamos aquí porque esta lei hai que botala abaixo", dixo a deputada de En Marea.

Pola súa banda, a portavoz nacional do BNG, Ana Pontón, instou á Xunta a que "escoite o clamor da comunidade educativa en contra da LOMCE" e "exerza as competencias que ten" en materia educativa co obxectivo de impulsar unha "lei de ensino" adaptada á "realidade" de Galicia.

Así, Pontón sinalou que dita lei debe apostar por unha educación "de calidade, igualitaria, en galego, feminista e que favoreza que o fillo ou filla de calquera traballador poida ir á Universidade do mesmo xeito que o fillo dun empresario".

O portavoz parlamentario do PSdeG, Xoaquín Fernández Leiceaga, tamén apoiou aos manifestantes e advertiu que as protestas poñen de manifesto a "necesidade" de dar "unha solución definitiva" aos alumnos de segundo de bacharelato que rexeitan as reválidas.

En declaracións aos medios, Leiceaga lembrou que no pleno desta semana o PSdeG trasladou ao presidente da Xunta, Alberto Núñez Feijóo, a preocupación dos estudantes dado que, segundo explicou o propio Leiceaga, "a estas alturas do curso aínda non se sabe como se farán as probas de acceso á universidade".