Desconvocan no último momento unha folga en Faurecia

O Comité de empresa de Faurecia Sistemas de Escapes en Vigo decidiu desconvocar a última hora a folga indefinida por horas que tiñan previsto comezar esta semana, tras chegar a un acordo coa dirección que garante "a carga de traballo e emprego para os vindeiros anos". 

Os sindicatos da auxiliar de PSA Peugeot Citroën (CCOO, UXT e CIG) asinaron un acordo que contempla a adxudicación de carga de traballo para o período 2016-2020 e "minimiza a perda do proxecto K9".

Segundo trasladou CC.OO., entre os puntos que se inclúen no convenio contémplase o investimento en tres novos equipos de produción para este ano por valor de 1 millón de euros, así como a asignación da fabricación de catalizadores, silenciadores e compoñentes de escape por un período que non transcendeu.

Ademais, o acordo establece que cos proxectos asignados no período 2016-2020 haberá unha ocupación media adicional de 25 traballadores e o volume mínimo de man de obra directa en 2020 será de 83 traballadores. A maiores, ábrese a porta para negociar o próximo ano a posible prexubilación de 28 empregados de máis de 58 anos cara 2018.