​O PXOM de Cabana de Bergantiños abre a porta a novos proxectos en Corcoesto

A Plataforma Salvemos Cabana denuncia que o borrador do texto de Plan Xeral de Ordenación Municipal de Cabana de Bergantiños constitúe "un novo intento do alcalde José Muíño de impoñer pola porta de atrás un futuro plan extractivo" en Corcoesto, onde fracasou un proxecto de megaminería. Tal e como informan nun comunicado, o texto refírese a "proxectos ou iniciativas que se poidan levar a cabo na antiga explotación mineira da zona", o que interpretan como unha porta aberta á reapertura do xacemento.

Ademáis, a Plataforma critica que se inclúa no documento un mapa manipulado sobre "áreas de exploración e investigación mineira". Salvemos Cabana contrastou o mapa do borrador do PXOM co do Censo Catastral Mineiro de Galicia, descubrindo que "non coinciden en absoluto", "dando a entender a preeminencia do interese extractivo sobre outro tipo de sectores, nunha zona definida por dúas clasificacións do solo incompatibles coa actividade mineira, como son o solo rústico de protección forestal e o solo rústico de protección paisaxística".

Salvemos Cabana lembra que o frustrado proxecto mineiro "provocou o conflito socioambiental máis grave na historia recente de Galicia". Así, non entenden cómo o rexedor "enfrontándose aos veciños, á Xunta e incluso en máis dunha ocasión ao seu propio partido, persiste de maneira reiterada no intento de activar un plan extractivo denostado por toda a sociedade galega".