​O Celta aspira a chegar máis lonxe ca o ano pasado na Copa

En Balaídos aínda se lembra a eliminatoria das semifinais da Copa do Rei da temporada pasada fronte ao Sevilla. Un recordo que o Celta aspira a superar nesta edición que para os celestes comeza este mércores fronte ao UCAM Murcia a domicilio.

Berizzo leva a Murcia a dezanove futbolistas para este compromiso. Entre eles non están Fontás, Radoja nin Aspas, nin outros xogadores sancionados ou lesionados. O técnico deixou claras, iso si, as súas intencións desde o primeiro momento: "Desde o primeiro partido debemos mostrar ilusión por gañar e competir".

"O obxectivo é chegar o máis lonxe posible", sostivo Berizzo, para quen o Murcia "é un equipo que intenta xogar e que o fai ben, pero estaremos preparados para calquera sistema que propoña mañá o seu adestrador".

O técnico deixou, ademáis, un recado para dous dos seus xogadores que menos minutos desputaron no que vai de temporada: "Naranjo xogará mañá e espero que se enganche a ese tren que viaxa a 200 kilómetros por hora que é o noso equipo. El e David Costas deben engancharse. Os dous serán titulares. Non contemplo rotar ofrecendo minutos gratuitamente. Quero competir e gañar".