​A Deputación de Lugo pide ao novo titular de Fomento que solucione os cortes da A-8

O vicepresidente da Deputación de Lugo, o socialista Álvaro Santos, emprazou ao novo ministro de Fomento, Iñigo da Serna, a que dea unha "solución" aos problemas derivados dos constantes cortes de tráfico, por néboa ou outras inclemencias meteorolóxicas, no tramo da A-8 comprendido entre os municipios de Mondoñedo e Abadín.

Tras a xunta de goberno, Santos subliñou que "hai que insistir en que iso se solucione e mentres iso non se solucione hai que dotar dunha transitibilidade segura e eficiente" á estrada N-634 que é por "onde se canaliza" o tráfico cando se pecha a circulación nese tramo da autovía.

O vicepresidente provincial fixo fincapé en que a circulación agora "é máis intensa que cando só existía a nacional 634, porque o acortamento de distancias significou que entrase máis tráfico por aí que o que entraba pola cornixa cantábrica".

É por iso que avanzou que solucionar este problema "será un eixo de traballo", da Deputación de Lugo. 

Álvaro Santos salientou que o feito "de ter pechado O Fiouco (que é o lugar dese tramo onde se concentran os problemas) ou aberto, significa o avance de tempo de cando non estaba construída (a autovía)".

Finalmente puxo o acento en que esta non é que sexa "a vía de entrada á provincia de Lugo, senón en toda Galicia da entrada do tráfico de mercadorías de España e de parte do tráfico que vén de Europa cara a Galicia".