En Marea propón impulsar unha estratexia para frear os suicidios en Galicia

En Marea buscará impulsar, se chega á Xunta tras o 25 de setembro, a creación dun novo plan de saúde mental en Galicia, así como impulsar unha estratexia de atención ao suicidio para frear o "repunte" do número de casos, que sitúan á Comunidade galega "á cabeza" do Estado neste ámbito.

Así o trasladou este luns en Santiago de man do seu candidato á Presidencia da Xunta, Luís Villares, quen alertou ante a necesidade de garantir a "asistencia universal" aos pacientes afectados de problemas relacionados coa saúde mental, que foron "os grandes desatendidos" desde o inicio da crise económica.

Ante a porta do Hospital Psiquiátrico de Conxo, un "referente simbólico" e o único centro sanitario deste tipo que permanece aberto en Galicia, Villares prometeu a posta en marcha "dun programa específico" que atenda ás características de "cada área sanitaria", centrado especialmente na "Atención Primaria", xa que é o "primeiro chanzo" para a "detección e abordaxe" dos problemas de saúde mental.

Así mesmo, indicou que é preciso mellorar a "coordinación" para garantir a "protección á dignidade das persoas", prestando atención de forma específica aos problemas derivados da "violencia machista".

En canto aos pacientes con "trastorno mental grave", Villares manifestou a necesidade de que o coidado destas persoas "non recaia nas asociacións de familiares", así como o seu compromiso para "mellorar" as condicións de vida dos enfermos institucionalizados e crear unha unidade de "atención infanto-xuvenil no sur de Galicia".

ATENCIÓN AO SUICIDIO

O cabeza de cartel de En Marea, acompañado en Conxo pola número seis pola provincia da Coruña, Flora Miranda, e pola concelleira de Política Social en Santiago, Concha Fernández; tamén se comprometeu a desenvolver desde o Goberno autonómico un "plan galego de atención ao suicidio" ante o "repunte" dos casos en Galicia, comunidade que lidera o ránking deste índice no conxunto estatal.

En relación a isto, Fernández apuntou que Lugo é a provincia "con máis número de suicidios" de España, seguida da Coruña; un problema para o que "nunca se abordou unha estratexia" desde a Xunta como "reclama o Movemento Galego pola Saúde Mental".

Pola súa banda, Flora Miranda afeou a actitude do Goberno galego que "a última hora e nun alarde electoralista" comprometeuse a sacar adiante medidas relacionadas coa saúde mental. Así mesmo, avogou por apostar por unha "Atención Primaria digna" de forma "digna, accesible e resolutivo" fronte a unhas unidades "saturadas" que atenden ata "40 pacientes por xornada laboral".