Pedro Sánchez reunirase este xoves con Besteiro

O secretario xeral do PSdeG, José Ramón Gómez Besteiro, trasladará este xoves a súa opinión ao líder do PSOE, Pedro Sánchez, sobre a actual situación política, transcorrido máis dun mes desde as eleccións xerais e a tan só 48 horas da celebración do comité federal do próximo sábado.

Besteiro reunirase con Pedro Sánchez ás 12.00 horas deste xoves na sede de Ferraz en Madrid, dentro da rolda de contactos cos dirixentes territoriais socialistas. Sánchez iniciou estes encontros bilaterais este luns cos secretarios xerais do PSOE en Murcia, Rafael González Tovar, e en Castela e León, Luís Tudanca, ambos afíns á dirección do partido.

Segundo as fontes consultadas, Besteiro tamén lle trasladará a Sánchez o seu "apoio absoluto" e defenderá a vixencia da folla de ruta aprobada polo comité federal do 28 de decembro, que fixou como límite para negociar con Podemos a renuncia ao referendo de autodeterminación en Cataluña.

Ademais, o martes Pedro Sánchez reuniuse co presidente de Aragón, Javier Lambán, e continúa este mércores co presidente da Xunta de Castela-A Mancha, Emiliano García-Page.