​Os viaxeiros aloxados nos hoteis galegos crecen case un 9% en outubro

Os viaxeiros aloxados nos hoteis galegos durante o pasado mes de outubro creceron un 8,93% con respecto ao mesmo mes do ano anterior, segundo os datos feitos públicos este mércores polo Instituto Nacional de Estatística (INE).

En concreto, durante o décimo mes do ano pasaron polos hoteis galegos un total de 407.731 persoas, 33.441 máis que en outubro de 2015. As pernoitas, pola súa banda, creceron un 9,53%, ata as 759.538.

Por provincias, a maior parte de viaxeiros foron para A Coruña, con 204.135 usuarios, seguida de Pontevedra, con 112.156, Lugo, con 62.362, e Ourense, onde os hoteis rexistraron 29.078 usuarios. A estancia media foi de 1,86 días.

Os 1.518 hoteis abertos en Galicia tiveron durante outubro unha ocupación media do 38,5% das súas prazas e do 44,57% das súas habitacións.

Os prezos hostaleiros experimentaron un repunte de 5,6 puntos en taxa interanual. Así, a rendibilidade por habitación dispoñible situouse en 26,68 euros, un 16% máis que hai un ano; mentres que a rendibilidade por habitación ocupada aumentou un 3,5%, ata os 56,29 euros.

DATOS NACIONAIS

A nivel nacional, os hoteis españois rexistraron 29,9 millóns de pernoitas o pasado mes de outubro, o que supón un 6,5% máis que no mesmo mes de 2015.

Durante os dez primeiros meses do ano, as pernoitas en establecementos hostaleiros aumentaron un 7,3% respecto ao mesmo período de 2015.

O avance interanual das pernoitas hostaleiras logrado en outubro débese ao aumento do 7,2% nas pernoitas realizadas polos visitantes e ao crecemento do 4,8% nas realizadas polos residentes en España.

Ademais, os hoteis facturaron 78,1 euros de media por habitación ocupada, o que supón un incremento anual do 4,3%. A estancia media baixou un 0,1% respecto de outubro de 2015, situándose en 3,2 pernoitas por viaxeiro.