O programa de vivendas baleiras da Xunta segue sen beneficiarios

O programa de vivendas baleiras da Xunta segue sen beneficiarios aínda que xa son máis de 20 os concellos adheridos, segundo destacou este mércores a conselleira de Infraestruturas e Vivenda, Ethel Vázquez.

O primeiro deles en adherirse foi Ourense, e "xa realizou os trámites correspondentes", polo que está "a piques de publicarse a orde".

Segundo explicou a conselleira a preguntas dos xornalistas, a comisión constituída entre o municipio ourensán e o Instituto Galego de Vivenda e Solo (IGVS) xa acordou "os criterios para identificar os inmobles e as familias".

"Xa se chegou a un acordo e publicarase nos próximos días no boletín oficial da provincia para que xa de forma inmediata se poña en funcionamento coas primeiras familias", asegurou.

En agosto, eran 18 as adhesións formalizadas e a Xunta fixou para setembro e na cidade de Ourense os primeiros resultados do programa, que se desenvolve ao amparo dun convenio coa federación galega de municipios e provincias (Fegamp). Este acordo foi autorizado polo Consello en abril e ambas as partes asinárono en maio.