16 anos de espera para unha praza de catedrático na USC

O colectivo de acreditados a cátedra da Universidade de Santiago de Compostela advertiu de que a proposta do equipo reitoral de crear 10 prazas implicaría unha espera de ata "16 anos" para algún dos seus membros a que se convoque unha praza da súa especialidade.

Por iso, e dado que a media de idade deste colectivo ascende aos 50 anos, os acreditados critican que "a solución proposta" realmente pola USC a este colectivo "non é outra que a da xubilación".

Nun comunicado, o colectivo lembra o rexeitamento do claustro universitario á convocatoria proposta polo equipo reitoral o pasado 3 de novembro, e critican a falta de "vontade" da USC ante a necesidade "imperiosa" de recoñecer tanto o dereito de promoción do seu profesorado como para "poñer o seu lugar" á institución académica na representación dos catedráticos nos diferentes comités.

En concreto, denuncian que a USC está "a perder capacidade operativa nas institucións nacionais e internacionais" ao mesmo tempo que a súa "competitividade", ante a falta de promoción profesional da institución.

TRES VECES MÁIS PRAZAS NA UVIGO

O colectivo compara esta situación coa das súas homóloga viguesa, que convocou "tres veces máis prazas para 2016" que as anunciadas pola USC a pesar de contar con orzamentos e unha taxa de reposición "bastante máis limitada".

Así mesmo, denuncian que desde a Xunta se promova unha política científica que busca implementar un programa de captación "temporal" de científicos, esquecendo "a promoción da excelencia" dos investigadores e profesionais cos que contan estas institucións.

Finalmente, solicitan a apertura "dun diálogo serio" e que se adopten medidas a "curto e medio prazo" tanto para solucionar a "inxustiza creada" a este grupo de profesorado como polas "nefastas consecuencias" da falta dun plan de persoal científico á altura do sistema universitario galego.