​Denuncian "apaños" na hospitalización de saúde mental no Álvaro Cunqueiro

Protesta de profesionales del Cunqueiro en marzo.

O Movemento Galego da Saúde Mental critica a implantación de "solucións simples" aos problemas de hospitalización de saúde mental infantil e xuvenil do sur de Galicia. Nun comunicado, lamentan que se abandone a idea dunha "Unidade de Hospitalización única sustentada nun proxecto terapéutico específico" para dar, no seu lugar, "unha saída apresurada á situación".

Segundo lles trasladaron os xefes de Pediatría e Psiquiatría do Hospital Álvaro Cunqueiro, as medidas pasan por diferenciar a hospitalización de nenos e adolescentes de xeito que os primeiros dependan de Pediatría e para os segundos se habilite "un espazo reformado" na zona de adultos, onde "illando un corredor, se habilitarían camas para adolescentes".

Desde o movemento lamentan unha estratexia que atribúen aos recortes sanitarios, "aparentando crear novas unidades" cando en realidade se van trasladar as dotacións profesionais, materiais e de espazo destinadas a adultos. "Son só apaños que desvisten uns santos para vestir mal outros", lamentan desde o MGSM, que cualifican a xestión de "improvisada, sen coñecemento nin participación dos profesionais".

Consideran que non é aceptable "ningunha solución que non sexa a de creación dunha Unidade de Saúde Mental para a Infancia e a Adolescencia da zona sur de Galicia con recursos específicos de nova creación". Reclaman, así, un proxecto e programas terapéuticos definidos e dotación de espazos, materiais e profesionais "específicos".