​Comeza o congreso de psicoloxía máis importante dos últimos 25 anos en Galicia

Os profesionais da psicoloxía ten esta semana unha cita en Santiago de Compostela, que acolle o congreso máis importante desta disciplina en Galicia dos últimos 25 anos. Trátase da terceira edición da reunión científica 'Camiños da Psicoloxía', que non se celebraba dene 1991 e que reunirá a 104 relatores de primeiro nivel, tanto de Galicia como do conxunto do estado.

Dende este mesmo xoves ata o vindeiro sábado abordaranse diferentes ámbitos como a saúde, a educación, a xustiza, os servizos sociais, o xénero... Dende o Colexio Oficial de Psicóloxía de Galicia afrontan esta reunión como unha "oportunidade excelente para actualizar coñecementos e reflexionar sobre os distintos aspectos do saber que conforman unha disciplina ampla con especial vocación aplicada".

A intención do congreso é "contribuír ao sostido crecemento científico e ao recoñecemento social que experimentou a Psicoloxía nas últimas décadas". Ao longo de tres días, en catro salas simultáneas, terán lugar 7 obradoiros, 11 conferencias e 23 simposios centrados en cuestións moi relevantes nas que a psicoloxía pode ser "parte da solución e desde logo, un recurso imprescindible para o benestar da cidadanía".

Cuestións de saúde pública de plena actualidade como o suicidio, a depresión ou o dano cerebral adquirido serán tratadas neste Congreso. Temas de especial transcendencia social, como a protección da infancia e da adolescencia, a intervención con menores infractores ou a corrupción, terán tamén o seu espazo dentro do programa. A seguridade viaria ou o envellecemento da poboación e as súas consecuencias centrarán algunhas das propostas, sen esquecer outras máis innovadoras, como son o coaching ou a psicoloxía deportiva.

Ademais dos simposios e conferencias, durante o xoves e o venres celebraranse obradoiros nos que se traballarán diversas competencias, desde o mindfulness ás ferramentas de avaliación do acoso no traballo, pasando polas competencias emocionais ou pola avaliación da credibilidade da testemuña, entre outros.