​O Dolmen de Dombate seguirá sendo estadio deportivo e escenario de concertos

Dende a plataforma ecoloxista Salvemos Cabana levan tempo denunciando o modelo de xestión basado na masificación do Dolmen de Dombate, con actividades que pouco teñen que ver co contido arqueolóxico do recinto e que poñen en perigo a súa conservación.

E non parece que o novo convenio asinado en xaneiro entre a Deputación da Coruña e o Concello de Cabana teña solucionado o problema, máis ben todo o contrario. Dende a plataforma xa consideraron "unha tomadura de pelo" a firma deste convenio no seu momento, e tras analizalo denuncian que incide unha vez máis "na masificación do enclave como principal ferramenta de posta en valor".

Así, destacan cláusulas como a 2.3.4 referente a "música e escenificacións teatrais", que afirma que "estas actividades levaranse a cabo sobre todo en tempada baixa aproveitando a acústica do centro arqueolóxico e a protección contra as inclemencias do tempo". Os ecoloxistas entenden que esta cláusula abre a porta a que o principal monumento prehistórico de Galicia siga utilizándose como unha " sala multiusos apta para calquera tipo de intervención pública.

Tamén critican a cláusula 2.3.7. referente á organización de organización de "competicións deportivas que leven por nome o Dolmen de Dombate", abogando porque "se poidan desenvolver na contorna ou preto do centro arqueolóxico". Dende Salvemos Cabana temen que se repita a situación do pasado ano, cando as máis de 400 persoas e os seus acompañantes que participaron na 'Carreira popular Dolmen de Dombate'" pasaron "en tropel" polo xacemento".

Por estas e outras razóns, consideran que o novo documento adoece dun "profundo descoñecemento sobre o que supoñen os conceptos de protección e posta en valor do patrimonio arqueolóxico". Neste sentido, entenden que a comisión político-técnica que debería velar pola correcta adecuación das actividades "non deixa de ser outra cousa que papel mollado" ante a situación que experimenta o xacemento nos últimos anos, "que únicamente termina por beneficiar os intereses do Partido Popular na Comarca de Bergantiños fronte á conservación deste Ben de Interese Cultural (BIC) que é patrimonio de todos e todas".

AGE PEDIRÁ QUE A XUNTA XESTIONE O XACEMENTO

Próximamente Alternativa defenderá no parlamento unha iniciativa para que a Xunta se faga co control do Dolmen de Dombate, considerando que"un concello pequeno non pode contar cos recursos suficientespara manter como se merece un ben de dimensión internacional como é o Dolmen de Dombate".

Para esta formación sería máis axeitado que a titularidade da xestión pasase á Xunta de Galicia, que podería encargarse de establecer os convenios de cooperación oportunos co concello de Bergantiños. A través da Dirección Xeral de Patrimonio Cultural, podería encargarse de velar pola integridade dun "ben sobranceiro, de valor incalculable e único para todas as galegas e galegos".