As cidades galegas, líderes en pisos baleiros

De entre todos os indicadores nos que poderían destacar, as cidades galegas recibiron o dubidoso honor de estar á cabeza de España no tocante a pisos baleiros, segundo recolle o proxecto europeo Urban Audit, que analiza diferentes indicadores socioeconómicos en máis de 900 cidades da Unión Europea.

En concreto, 5 das 7 principais cidades galegas aparecen na parte alta da táboa comparativa, que presenta datos de 2011 (os últimos dispoñibles). Trala primeira posición, ocupada pola catalana Manresa, aparecen Ourense e Lugo ocupando os restantes postos do podio, cun 21.71 e un 20,75% de vivendas baleiras respectivamente. Seguíndoas de cerca está Ferrol, que ocupa a cuarta posición cun 19,78%. 

Hai que baixar un pouco máis na táboa, pero non demasiado, para atopar a Pontevedra, que ocupa o 11º posto cun 17,41% de pisos baleiros e Santiago, no 14º lugar cun nada desdeñable 16,93%. 

Un pouco mellor paradas salen as dúas maiores cidades de Galicia. A Coruña sitúase no posto 29º cun 14,24% e Vigo no 44º cun 12,95%. Aínda así, ambas están na metade superior dunha táboa que inclúe máis de 100 cidades españolas. 

O que non indica este estudio, é que porcentaxe destas vivendas pertencen a particulares e cantas a entidades de aforro. Recentemente a Xunta presentou un programa polo que prepara un censo de todas as vivendas baleiras que teñen as entidades de aforro en propiedade.