Última oportunidade para salvar o 'Modern Express'

As autoridades francesas acometen durante este luns o último intento de remolcar o mercante 'Modern Express', que xa leva seis días á deriva en dirección á costa francesa. Se fallan, o mercante encallará no suroeste de Francia, nas costas de Aquitania.

En todo caso, xa se preparan posibles continxencias por se falla este último intento de remolque e o navío remata encallando na costa francesa. 

Nese caso activaríanse plans antipolución, xa que poderían abrirse brechas nos depósitos de carburante. Pero as autoridades francesas quixeron deixar claro que non se teme unha marea negra, que este caso non ten "nada que ver co Prestige". Recordan que o petroleiro transportaba 77.000 toneladas de combustible, mentres que o Modern Express tan só leva 300. 

O resto da carga do mercante son 3.600 toneladas de madeira e unha decena de máquinas de obra pública.