Desarticulan un clan familiar dedicado ao tráfico de drogas con base en Lugo

Material requisado na operación

A Garda Civil detivo 10 persoas no marco dunha operación policial na que se desactivou un clan familiar dedicado ao tráfico de drogas e outros delitos que tiña a súa base en Lugo. 

A operación ‘Vector-Kalina’ contra o tráfico de drogas desenvolveuse en Lugo e Madrid, onde foron detidas 7 e 3 persoas, respectivamente, con idades comprendidas entre os 23 e os 51, aos que se acusa de delitos contra a saúde pública, falsificación de moeda e documentos, tenza ilícita de armas e pertenza a grupo criminal.

A Garda Civil rexistrou tres domicilios nos que incautou unha pistola semiautomática, unha pistola de fogueo, perto dun quilo e medio de hachix, 12 gramos de anfetaminas, útiles para o tráfico de drogas e diñeiro e documentos falsificados, entre outras cousas.

Segundo informa a Garda Civil nun comunicado, este grupo tiña a súa cabeza en Lugo e a investigación iniciouse tras unha denuncia por violencia de xénero no ámbito dunha familia residente na capital lucense que contaba con contactos en Madrid.

“GRUPO PERIGOSO”

A Garda Civil cualifica este clan familiar como un “grupo perigoso, disciplinado, con repartición de funcións, perfectamente organizado e fortemente xerarquizado”. O xefe é A.R.M., de 37 anos, que foi un dos detidos en Lugo.

Esta operación contou cunha primeira fase o pasado mes no que foron rexistrados dous domicilios e detidas seis persoas. As forzas da orde destacan o achado dun “zulo oculto tras un azulexo da parede, cun sofisticado sistema provisto de corda e bandexa” que, presumiblemente, empregábase para o tráfico de droga.

INVESTIGADOS DESDE FEBREIRO

A investigación iniciouse en febreiro, cando a policía xudicial de Burgos obtivo información relevante respecto duns delitos de violencia de xénero e ameazas de morte na contorna dunha familia residente en Lugo. O clan investigado, con lazos en Madrid e sen actividade laboral remunerada coñecida, levantou as sospeitas policiais, xa que se pensou que podería estar relacionado co tráfico de drogas.

Froito das detencións e os rexistros, foi intervido diverso material, desde unha pistola a tres navallas, seis bastóns e diversas cantidades de droga, entre elas 1,3 quilos de haxix. Tamén foron intervidas tres carteiras do tipo policial, 835 euros en billetes de curso legal e doce terminais de telefonía móbil.

O grupo mantiña fortes medidas de seguridade, cambiaba repetidamente de teléfonos e tiña unha xerga propia.