​Militantes do PSdeG reclaman á xestora que convoque "xa" o Congreso Federal

A plataforma 'Galicia. Primarias xa, Congreso xa', integrada por militantes do PSdeG, reclamou á xestora do PSOE a convocatoria "urxente" do Congreso Federal para escoller unha nova executiva nacional co obxectivo de evitar que aumente "a división interna" existente nas filas socialistas e para volver facer do partido "o referente do progresismo".

Na mañá deste sábado reuníronse na agrupación local do PSOE de Santiago máis de 50 militantes socialistas convocados por esta plataforma, que esixe á xestora que dirixe o presidente de Asturias, Javier Fernández, a convocatoria antes de final de mes do Congreso Federal.

Entre os asistentes á primeira reunión desta plataforma atopábase a deputada socialista no Congreso, Rocío de Frutos, multada polo partido por romper a disciplina de voto cando votou 'non' á investidura de Mariano Rajoy. No inicio do acto, a parlamentaria recibiu unha ovación dos seus compañeiros de partido.

Aida Loira e Sonia Pillado, militantes socialistas en Pontevedra e Narón (A Coruña), respectivamente, foron as encargadas de ler un manifesto no que critican a situación actual do partido, que presenta "urxencias" que deben ser emendadas a través dun congreso que renove "os órganos federais" e do que salga "unha nova dirección".

MOVEMENTO A NIVEL ESTATAL

O acto deste sábado en Santiago encádrase nunha serie de movementos que se están producindo entre os militantes socialistas a nivel estatal que, do mesmo xeito que o caso de Galicia, están a organizarse en plataformas para esixir á Xestora federal a convocatoria do congreso como "recollen os estatutos" do partido.

Así, estes socialistas críticos coa xestión actual do PSOE cren que a convocatoria debe producirse "antes de final de mes" porque, de seguir atrasando a súa celebración, "máis se acrecentará a división interna" no partido e maior será a dificultade para recuperar o seu espazo como forza "progresista de referencia" do país.

Neste sentido, o exdiputado e exsenador socialista Francisco Xavier Carro indicou que a situación actual pode servir como unha "oportunidade" para recuperar a confianza da sociedade no partido. Unha perda de credibilidade que, na súa opinión, non se iniciou tras a saída de Pedro Sánchez da secretaría xeral senón que se remonta "á segunda lexislatura de Zapatero".

"Contradicir todos os argumentos de Podemos afastounos da nosa base social", remarcou, para logo indicar que "neste momento" os militantes socialistas deben "dar exemplo" e reclamar á Xestora que convoque "xa" o congreso aínda que este se vaia a celebrar "en xuño".

OS "DOUS" PSOE

Así mesmo, Carro cre que o PSdeG debe decidir "que papel" quere xogar no "conflito" aberto nas filas socialistas a nivel español que, para el, conta con "dous modelos": por unha banda, o socialismo "do sur de España", representado por Andalucía e de carácter "españolista, moi parecido ao PP"; mentres que, no lado oposto, están "o PSC, Valencia ou o País Vasco".

Para o excongresista, o PSdeG debe aliñarse con estes últimos, xa que defenden un modelo territorial "federalizante", a "única solución" para enfrontar "as tensións" existentes en España.

LEICEAGA PREGUNTARÁ A FEIJÓO SOBRE O SISTEMA DE FINANCIAMENTO

O presidente da Xunta, Alberto Núñez Feijóo, responderá no próximo pleno, que terá lugar os próximos días 13 e 14 de decembro, sobre o sistema de financiamento autonómico a petición do grupo socialista. E é que o portavoz parlamentario do PSdeG, Xoaquín Fernández Leiceaga, xa desvelou este sábado cal será a pregunta que o seu grupo formularalle a Feijóo --En Marea e o BNG aínda non o fixeron--.

Na súa comparecencia tras a Xunta de Portavoces, o portavoz parlamentario do PSdeG explicou que a pregunta que o seu grupo realizará ao xefe do Executivo autonómico será rexistrada este luns e versará sobre "os resultados que convén alcanzar por parte de Galicia no sistema de financiamento autonómico cando se revise nos próximos meses". "Un debate que esta pendente desde o ano 2014", apostilou respecto diso.