A RAG alerta de que só se lle transmite o galego a un terzo dos nenos nados no século XXI

Un estudo presentado na Real Academia Galega (RAG) alerta do uso "maioritario" do castelán a idades temperás, remarcando ademais que os procesos castelanizadores "teñen un impacto maior" entre a poboación máis nova.

No traballo, incídese en que "só se lle transmite o galego a un terzo dos nenos nados no século XXI" e apunta que estes utilizan "maioritariamente" o castelán "en todos os contextos de socialización". "Tal é así que oito de cada dez pequenos falan en castelán cos seus amigos", engade.

O estudo recóllese o último número da 'Revista Galega de Educación', editado polo movemento de renovación pedagóxica Nova Escola Galega e presentado este mércores nun acto na RAG segundo informa esta institución nun comunicado.

FORMACIÓN A EDUCADORES

Sobre este número, sinala que a presidenta de Nova Escola Galega, Mariló Candedo, subliñou o momento "realmente malo" que está a pasar o galego na educación dos máis pequenos.

Respecto diso, o investigador do Seminario de Sociolingüística da RAG, Xaquín Loredo, autor do artigo, incidiu en que a familia está a perder "peso lingüístico" fronte a outros contextos externos". Por iso, a presidenta de Nova Escola Galega avogou por traballar na formación dos educadores para reforzar a transmisión do galego no ensino.