​200 gandeiros levan meses sen cobrar polo seu leite

Uns 200 gandeiros galegos levan varios meses sen cobrar polo seu leite --na súa maioría das provincias da Coruña e Lugo, aínda que tamén da comarca de Deza--, dos cales 50 non recibiron "nin un céntimo" desde xaneiro, nuns pagos que lles deben primeiros compradores que exercen de intermediarios entre os produtores e as industrias.

Así o denunciou o secretario xeral de Unións Agrarias (UU.AA.), Roberto García, nunha rolda de prensa na que esixiu "endurecer" os criterios para poder actuar como primeiro comprador, unha figura que funciona como "tratantes de leite", co fin de que cumpran uns niveis de solvencia ou as empresas para as que traballan respondan "subsidiariamente" ante casos de falta de pagamento.

E é que censura que estes primeiros compradores usan aos produtores como "prisioneiros", xa que están baixo ameaza de non recibir nunca o seu diñeiro se presentan denuncia. Por iso, demanda que as administracións usen os mecanismos dos que dispoñen e actúen con "contundencia" para controlar unhas prácticas de "estafa".

Sobre esta figura de primeiros compradores, Roberto García advertiu de que nas últimas semanas apareceron carteis por Lugo con anuncios para comprar leite a gandeiros, dos que supostamente está detrás "unha inmobiliaria" que ten como obxectivo "aproveitarse da situación de desesperación" dos produtores.

POR BAIXO DO PREZO DO LEITE EN PO

Así mesmo, García alertou de que "por primeira vez na historia" os prezos que se abonan a produtores polo seu leite están por baixo do que se paga polo leite en po e a manteiga, que tiveron unha alza do 40 por cento nos últimos meses nos mercados mundiais e son a pauta para seguir para o prezo do leite.

Os últimos datos feitos públicos polo Ministerio de Agricultura sinalan que o prezo que se paga polo leite en Galicia en xullo a produtores foi de 26,8 céntimos o litro, de maneira que segue como o máis baixo de toda España. Con todo, na Comunidade hai uns "3.000 gandeiros" que cobran 23 céntimos o litro, isto significa que as industrias que lles recollen van cobrar o litro a 29 céntimos "sen facer nada", só con levalo a unha torre para leite en po.

A respecto diso, considera que as administracións e a Comisión Nacional dos Mercados e a Competencia (CNMC) debería tomar cartas no asunto, porque "se está permitindo unha adulteración", dado que 'o prezo chan' debería estar a partir do que marca o leite en po e a manteiga, mentres reclama que se renegocien á alza eses contratos cos produtores.

Unha cuestión que, segundo o sindicato agrario, repercutirá en que as industrias e a distribución terán unhas contas de resultados "históricas", mentres o campo galego atravesa unha das súas maiores crises.

DENUNCIA CONTRA LACTALIS

Por outra banda, Unións Agrarias presentou denuncia no xulgado de instrución de Vilalba (Lugo) contra a multinacional francesa Lactalis polo que entende unha "apropiación indebida" de dous millóns de euros que lles corresponderían aos gandeiros en virtude dos acordos alcanzados para reverter nos produtores a subida dos prezos que abona a distribución á industria.

Ademais, este sindicato agrario continuará coa campaña de boicot contra Lactalis por este motivo cunha campaña de información a consumidores que levará a cabo o vindeiro xoves, nun centro comercial da provincia da Coruña.

"XUDICIALIZAR" O PAPEL DA AICA

Tras informar de que o vindeiro luns haberá unha nova reunión do comité de seguimento da situación do lácteo, Roberto García queixouse de que Unións Agrarias presentou un total de 17 denuncias ante a Axencia de Información e Control Alimentarios (AICA) para que investigue cuestións irregulares sen que tivesen comunicación de que pasou con eses expedientes.

No tocante a este extremo, indica que se en 15 días non obteñen resposta vai xudicializar " o papel da AICA", de forma que non descartan denunciar a funcionarios por incumprimento penal do procedemento, pois entende que Unións Agrarias no seu papel de denunciante ten dereito a saber que ocorre coa súa protest