Galego
Localizan no Grove o cadáver dun home que caeu dun barco
A vítima, que non sabía nadar ben, era un dos pasaxeiros dunha embarcación turística onde se estaba a celebrar unha festa nocturna.
Os efectivos de emerxencias localizaron esta noite no Grove (Pontevedra) o corpo sen vida dun home que se precipitou á auga desde unha embarcación.
O cadáver foi atopado pola Policía Local nas proximidades do espigón da localidade. A vítima era un dos pasaxeiros dunha embarcación turística onde se estaba a celebrar unha festa nocturna.
Unha persoa particular contactou co 112 Galicia ás 23:45 horas deste sábado para dar a voz de alarma. Indicou que o home non sabía nadar ben.
No Centro de Atención ás Emerxencias do 112 púxose en marcha un operativo de rescate. Informouse da situación a Salvamento Marítimo, ao Servizo de Gardacostas de Galicia, a Urxencias Médicas e á Policía Local. No dispositivo tamén participaron efectivos de Protección Civil e da Garda Civil.
Salvamento Marítimo mobilizou aos helicópteros Pesca 1 e Helimer 205 e á embarcación Salvamar Sargadelos. Urxencias Médicas, pola súa banda, enviou unha ambulancia. Ademais, os efectivos de Protección Civil peitearon a zona nunha embarcación.
Finalmente, o cadáver foi localizado nas proximidades do porto e recuperado desde terra.
Localizan un cadáver en el Miño
Escribe tu comentario