​O alcalde de Soutomaior: “Quen o prendeu, sabía a barbaridade que facía”

O quinto lume rexistrado no que vai de semana, que comezara ás 16,00 do serán do martes e afecta aos lugares de Alxán e O Rial, quedou “estabilizado” pola brigada segundo informou Agustín Reguera, alcalde de Soutomaior.

PROVOCADO CUN 99% DE SEGURIDADE

Segundo relataron os veciños a Agustín Reguera, o lume comezou “ao carón do campo da festa”. A orixe deste foco descoñécese polo momento pero o alcalde sostén que “a posibilidade da casualidade non existe” e condena que “quen o prendeu, sabía a barbaridade que facía”.

Así o asegurou tamén a Consellería de Medio Rural da Xunta, que confirmou ademais, que ademais dos tres focos iniciais do incendio houbo dous máis que se foron engadindo durante as tarefas de extinción: un en Viascón, que queimou cinco hectáreas de superficie, e outro en Agusantas, que calcinou 0,14 hectáreas de bosque. 

As chamas foron provocadas, cun "99,90% de probabilidade", dixo o Tenente Álvaro Lago Lusquiños, máximo responsable da investigación do Seprona da Garda Civil en Pontevedra.

SEMELLANZAS CON 2006 

As chamas calcinaron “parte do pouco que non ardera en 2006”, dixo Reguera, aínda que precisou que a situación de hai dez anos fora “dez veces peor” cá vivida na xornada de onte. 

Pese a non precisarse desaloxos, o lume chegou preto das vivendas. De feito o propio alcalde contou que participou ata as dúas da madrugada no seguimento das tarefas de extinción nas proximidades dunha casa que “estivo en perigo” ata que un descenso do vento minimizou o risco.

Reguera tamén encomiou a labor dos veciños cuxa colaboración foi imprescindible. O alcalde tamén dixo que “non houbo queixa” a respecto dos medios de extinción tanto materiais como humanos. A Soutomaior chegaron ó menos 3 hidroavións e ata 8 helicópteros.

CASTELO

Pese a que comezou a arder “a menos dun quilómetro” do Castelo de Soutomaior, o alcalde da localidade non temeu pola integridade do recinto posto que o vento “case ía en dirección contraria” e as chamas acabaron desprazándose a Redondela, onde si houbo desaloxos.