O ciclo "Cine de Verán" proxectará o filme "Vida" do ourensán Rubén Riós

Presentación do ciclo "Cine de verán" co lema: "Enchamos a provincia de Vida"

A Deputación de Ourense organiza este ano o ciclo "Cine de Verán" baixo o lema "Enchamos a provincia de Vida", coa proxección do documental Máis ca vida e o filme de ficción Vida, do director Rubén Riós, que se exhibirán en 10 localidades da provincia de Ourense ao longo dos meses de xuño, xullo e agosto. A iniciativa foi presentada esta mañá no Centro Cultural "Marcos Valcárcel" por parte do presidente da Deputación de Ourense, Manuel Baltar; o director do proxecto Vida, Rubén Riós; e o actor protagonista da película, Óscar Rodríguez.

Baltar destacou a importancia de contar cun traballo de Rubén Ríos nesta actividade "incluída no plan de mandato Ourense 15-19", e a través da cal "desenvolverase un circuíto de cinema pola provincia de Ourense da man do creador ourensán Rubén Ríos, quen converte en realidade o que soña, e que ten xa unha exitosa traxectoria na que recibiu dous premios Mateo polos seus traballos audiovisuais Adeus Edrada e Coser e Cantar. Vida, afirma o presidente do goberno provincial "é máis ca unha película, e, sen dúbidas, encherá de emoción a provincia de Ourense durante os meses de verán".

Dúas obras audiovisuais para este proxecto

O proxecto Vida comprende dúas obras audiovisuais, Máis ca Vida, un documental que recolle as testemuñas reais do día a día do mundo que rodea a rapaces e rapazas con capacidades distintas, e Vida, unha obra de ficción na que se mestura arte, entretemento e comunicación, converténdose na primeira experiencia audiovisual destas persoas. O filme conta no seu reparto artístico cos actores como Javier Gutiérrez, Cristina Castaño, Mariana Carballal, Estíbaliz Veiga, María Mera e Luis Iglesia, entre outros, que trasladan ao espectador dunha maneira lúdica, positiva e realista, as diferenzas sociais existentes que invitan á reflexión.

Rubén Riós agradeceu á Deputación de Ourense a súa aposta por este traballo porque "é gratificante sentirse identificado na terra de un e que alguén poida ser profeta na súa terra, porque a Vida espéralle un recorrido moi interesante por todo o mundo, proximamente en países como Arxentina e República Dominicana", e tamén agradeceu aos "máis de 10.000 espectadores que viron este proxecto no Auditorio de Ourense".

O director de Vida adiantou que o seu traballo irá encamiñado "a través da docencia, cara á inclusión, e sobre todo, por medio dunha realidade que ás veces se nos escapa porque non nos educan nesa diferenciación que é tan importante na sociedade de hoxe en día", e asegurou que este proxecto, e coñecer a Óscar, "cambioume a vida, tanto no ámbito persoal como profesional".

Rubén Ríos adiantou que o vindeiro 16 de xullo "será un día importante para esta provincia, porque por primeira vez unha persoa de Ourense con discapacidade intelectual, Óscar Rodríguez, ofrecerá o seu primeiro TED, na Cidade da Cultura, que leva o título de "El niño de la baldosa" e para o que xa están esgotadas todas as entradas".

Pola súa banda, Óscar Rodríguez animou a todo o mundo a que non deixe de soñar porque "para min Máis ca Vida e Vida é un soño feito realidade, no que a xente poderá ver que as persoas con discapacidade estamos aquí para traballar e estamos preparados para facer isto e moito máis".

Datas das proxeccións: 

• 17 de xuño: Ourense e 18 de xuño en Verín.
  
• Xullo: día 8 de xullo en Maceda; o 15 en Xinzo; o 26 no Carballiño, e o día 30 na Rúa.
• Agosto: día 13 en Riós, o 18 en Celanova, o 20 na Veiga, e o 26 na Valenzá (Barbadás).

Horario: Ás 22.30 horas, excepto no caso de Ourense que será ás 23.00 horas.