​A defensa reclama a nulidade da citación de Baltar pai

As defensas de Manuel Baltar e do seu pai, José Luis Baltar, reclamaron este mércores a nulidade da citación do segundo no caso que investiga ao actual presidente da deputación a raíz da denuncia dunha muller que o acusou de ofrecerlle un traballo a cambio de sexo.

Observan unha posible "vulneración" dos dereitos de defensa de José Luis Baltar, esgrimindo como unha das causas que o expresidente da Deputación de Ourense tería que ser informado con máis tempo.

Por iso solicitan á responsable do Xulgado de Instrución número 3 de Ourense a nulidade da citación que o convocou este mércores como investigado por un suposto delito de suborno e tráfico de influencias en relación ao caso polo que se investiga ao seu fillo.

José Luis Baltar estaba citado para as 10,30 horas deste mércores, en calidade de investigado, media hora máis tarde que Francisco G. --citado en calidade de testemuña--, e que é representante do hotel no que supostamente terían lugar os encontros entre Manuel Baltar e a muller que o denunciou.

Ningún dos dous declararon e ambos abandonaron o edificio xudicial á espera de que a xuíza Eva Armesto dea resposta á petición das defensas de José Luis Baltar e Manuel Baltar, que reclamaron a nulidade da citación a José Luis Baltar alegando defectos de forma.

Desde a acusación particular exercida por Democracia Ourensá mostráronse dispostos a que se atrase a declaración de José Luis Baltar, coa intención de que poida ter un maior coñecemento da causa.

Á súa saída do edificio nin José Luis Baltar nin o seu avogado quixeron facer declaracións aos numerosos medios de comunicación presentes ás portas do xulgado.