Galicia perde máis de 16.000 habitantes en 2014

A poboación de Galicia a 1 de xaneiro de 2015 sitúase en 2.732.347 habitantes, de forma que ao longo de 2014 se perderon 16.348 habitantes (-0,59%) respecto aos 2.748.695 cos que rematou 2013.

Así figura no padrón municipal publicado este xoves polo Instituto Nacional de Estatística (INE), no que se observa que continúa a perda de poboación galega, aínda que en 2014 se produciu a un ritmo menor que o descenso de 17.245 habitantes de 2013.

Por provincias, A Coruña liderou en 2014 a perda de poboación en cifras totais, con 5.539 habitantes menos (-0,49%), ata quedar nun total con 1.127.196 fronte aos 1.132.735 que había un ano antes.

Ségueo Ourense coa caída dunha poboación de 3.902 persoas, ata os 318.391 habitantes, fronte aos 322.293 habitantes dun ano antes, o que supón o maior descenso porcentual, pois supón un retroceso do 1,2%.

Pola súa banda, Pontevedra pechou 2014 con 947.374 habitantes, o que supón 3.545 menos (queda sen un 0,37% da súa poboación) que os 950.919 que tiña ao rematar 2013.

Lugo rematou 2014 con 339.386 habitantes, 3.362 cidadáns menos que os 342.748 cidadáns cos que rematou 2013.