Empresarios de Vigo piden 'pelexar' polo AVE por Cerdedo

O alcalde de Vigo, Abel Caballero, remarcou que se o tren de alta velocidade non conta coa ligazón por Cerdedo estarase a "perder unha oportunidade histórica, que é a centralidade de Vigo", ao que o presidente do Círculo de Empresarios de Galicia, Juan Güell, engadiu que "a única forma" de que Vigo se poida subir "a ese tren" do AVE "é pelexar" por ese tramo.

Estas declaracións realizáronas despois de manter este martes unha reunión, na que coincidiron na importancia de que o AVE chegue ata Vigo e en que a situación é "moi preocupante". "Quedaremos relegados se non facemos un esforzo por variar unha tendencia que lamentablemente ten toda a pinta de que vai por mal camiño", lamentou Güell.

Neste marco, o presidente dos empresarios fixo fincapé en que "o que mantén viva esa liña é o interese dos vigueses". "Se damos a entender que non é importante ou nos dá igual, dámolo por perdido", adiantou.

"É verdade que é caro facer unha segunda vía", recoñeceu, aínda que insistiu en que a pesar diso "non ten sentido deixar fóra a Vigo". "O erro que se cometeu é malo para a cidade pero é moi malo tamén para Galicia. Perdeuse unha oportunidade de vertebrar toda Galicia, con Madrid e a península pero tamén entre nós", remarcou.

Caballero, pola súa banda, subliñou que o AVE ata Vigo é "un obxectivo irrenunciable; algo que esta cidade demanda e vai seguir demandando". "Se non sae neste momento, nunca máis volverá haber esta oportunidade e quedarémonos marxinados", mantivo, antes de indicar que se Vigo queda fóra, "O Porto non quererá vir por Santiago porque lle será mellor ir a Madrid por Lisboa".

Neste contexto, o rexedor tamén trasladou que está a constatar que en Vigo "hai unha inmensa onda en favor do tren de alta velocidade", e adiantou que seguirá facendo unha rolda de contactos para contrastar opinións e transmitir "que neste momento está a xogarse para sempre a alta velocidade en Vigo".

GOBERNO ESTATAL E GALEGO

Na rolda de prensa, Caballero volveu a recalcar que "Vigo quedou fóra do tren de alta velocidade por decisión do Goberno de España con Aznar, e a Xunta con Fraga, que nos mentiron e nos enganaron, dicindo que se faría unha ruta polo Miño da que non se sabe nada".

"Pasaron 16 anos e Vigo segue fóra das redes de alta velocidade de España e Europa nun momento no que chega a todas partes", criticou, apuntando que agora "o Goberno de España presidido por Rajoy, sinxelamente non vai facer o AVE de Vigo; unha decisión consensuada co señor Feijóo, que nunca fala do AVE de Vigo, para Feijóo non existe".