CSIF denuncia que a Xunta prescinde da "obrigada" negociación colectiva en emprego público

CSIF afirma que a Consellería de Facenda "se salta a lei e prescinde nesta lexislatura" da negociación colectiva en materia de emprego público.

A través dun comunicado, a central asegura que o Goberno galego "aproveitará a súa maioría parlamentaria para modificar as normas que afectan os empregados públicos sen o seu coñecemento para evitar protestas".

Así, indica que nunha reunión informativa mantida o pasado día 15 coas organizacións sindicais, "o director xeral de Función Pública, exercendo a portavocía da consellería, anunciou que a Xunta non volverá negociar cos sindicatos nin lles dará a coñecer os anteproxectos de lei que afecten as condicións de traballo e retributivas dos empregados públicos".

"A pesar de que ditas materias son obrigatoriamente obxecto de negociación por así establecelo o artigo 37 do Estatuto Básico do Empregado Público, o Director Xeral de Función Pública manifestou na reunión que o Goberno galego, a partir de agora, prescindirá da obrigada negociación colectiva e que trasladará directamente os proxectos de lei que afecten a estas materias aos 'representantes da soberanía", segundo sinala CSIF.

Respecto diso, entende que o Executivo "pretende aproveitar a maioría parlamentaria para modificar por lei toda canta norma afecte os empregados públicos galegos, subtraendo o seu coñecemento previo aos traballadores tentando evitar así calquera tipo de protesta e mobilización".

"E iso a pesar de vulnerar o establecido no EBEP (norma estatal básica de obrigado cumprimento)", apostila.

Ante unha "falta de negociación" por parte da Consellería de Facenda, CSIF pediu reunión con todos os grupos parlamentarios co obxectivo de "presentarlles propostas de emendas, coa intención de evitar ou minimizar os efectos prexudiciais desta nova política da Xunta de Galicia".