O 'descoñecido' San Martiño Pinario abre as súas portas ao turismo

A Igrexa-Museo de San Martiño Pinario, en Santiago de Compostela, organizará este martes 13 de decembro un encontro-taller con integrantes do sector turístico e docentes para difundir a importancia histórica deste lugar e as novas opcións de visita e actividades deseñadas para dar a coñecer "un edificio que é aínda un gran descoñecido".

Así o asegurou o reitor do Seminario Maior Compostelán, Carlos Álvarez, durante a presentación do encontro 'San Martiño Pinario: referente histórico e artístico de Santiago de Compostela', que acollerá o edificio este 13 de decembro a partir das 10,00 horas.

O encontro, aberto a guías de turismo, persoal de hoteis e axencias de viaxes e docentes; é de asistencia gratuíta e as inscricións prolongaranse ata o venres 9 de decembro. Do centenar de prazas dispoñibles, ata hora completáronse unhas 40, entre as que o reitor destacou a "boa resposta" do conxunto do sector turístico, especialmente no caso dos guías.

A intención desta xornada é "abrir as portas máis aínda se cabe" do Seminario Maior Compostelán para "darse a coñecer" á sociedade e "consolidar" as súas actividades culturais de conexión coa cidadanía.

NOVO SISTEMA DE VISITAS

Con esta intención, desde a xestión da Igrexa-Museo está a deseñarse un novo sistema de visitas que permitirá o acceso a novas estancias, que ata agora non se visitaban, e que, acompañadas de distintas actividades culturais, permitan incrementar o número de persoas que anualmente visitan esta institución.

Estas novas visitas facilitaranse, entre outras cuestións, grazas a un convenio asinado recentemente coa Facultade de Xeografía e Historia da USC e que permitirá, desde 2017, contar cun grupo de estudantes bolseiros nas instalacións, que faciliten a vixilancia e o acceso a salas que habitualmente non son de visita.

Carlos Álvarez confiou en que as novas visitas guiadas e as actividades que acolla o centro permitan que exista un "acceso máis libre" á institución e se coñeza mellor un edificio que aínda é un "gran descoñecido" na cidade.

Pola súa banda, o responsable do Museo, José Antonio Otero, expresou o seu desexo de que este sistema estea "moi avanzado" para a celebración do 150 aniversario da instalación do Seminario Maior neste Mosteiro, que terá lugar en 2018, así como a conmemoración do 190 aniversario da fundación do propio Seminario na súa primeira sede, o antigo Colexio San Clemente.

APOSTA POLO ÁMBITO DOCENTE

Na actualidade, o recinto conta cunha media duns 120 visitantes ao día nas visitas guiadas de tempada alta. Con todo, esta cantidade diminúe de forma importante durante os meses de inverno. Para "reverter" esta situación, os responsables da institución aposta por traballar no ámbito docente, con colexios e institutos da cidade.

Coa vista posta no Ano Santo 2021, desde San Martiño Pinario intensificaron nas últimas semanas os traballos de elaboración do Plan Director, coa elaboración dun informe técnico sobre o estado de conservación da igrexa, especialmente a Capela da Virxe do Socorro e as súas pinturas murais e a restauración do retablo de Santa Gertrudis a Magna.

Do mesmo xeito, está a definirse a incorporación ao percorrido museístico e das visitas de novas tecnoloxías para que os visitantes coñezan o monumento na súa integridade.

SEMINARISTAS

Con todo, Carlos Álvarez non quixo deixar de lado a función principal deste edificio, o seu papel como Seminario Maior, e destacou os beneficios que teñen as visitas para que a sociedade entre en contacto con el.

Nesta liña, o reitor apuntou que na actualidade están en San Martiño Pinario 24 seminaristas e que os datos de vocacións son bos "en número e calidade". A esta cifra súmase, así mesmo, a de participantes en encontros semanais e mensuais.