​Carmen Santos súmase á defensa dun Podemos descentralizado

A secretaria xeral de Podemos en Galicia, Carmen Santos, subliñou que os cargos da súa formación teñen "o compromiso absoluto de respectar as limitacións salariais de tres soldos de maneira inamovible", xa que, precisou, isto é ao que se comprometeron.

Nunha entrevista en Radio Galega, Carmen Santos avogou por abordar internamente calquera discrepancia cos deputados da formación integrados en En Marea que rexeiten cederlle parte do soldo e se cingan á doazón ao partido instrumental: "Se hai algunha cuestión de incompatibilidade ou algunha cuestión que haxa que dirimir, vai dirimir internamente polos órganos de garantías democráticos que existen en todos os partidos".

En todo caso, Santos considera que se está forzando un debate "falso": "Parece que o único que nos preocupa é isto, algo que é absolutamente falso, que é unha infamia e que afasta de maneira perniciosa e interesada o verdadeiro debate con respecto ás cuestións financeiras". Trátase do "financiamento ilegal doutros partidos políticos" e da "condonación de débedas dos bancos a outras forzas políticas", argumentou.

MODELO DESCENTRALIZADO PARA PODEMOS GALICIA

Así mesmo, Santos defendeu un modelo descentralizado para Podemos Galicia ao amparo das decisións que se tomaron tamén no seo da organización en Andalucía: "É lóxico que as comunidades que temos esa idiosincrasia propia e que temos esas condicións de identidade nacional teñamos en Podemos un modelo máis descentralizado que o resto", opinou.

En relación ao debate interno en Podemos, defende combinar as estratexias escenificadas por Pablo Iglesias e Íñigo Errejón, mesturando a persuasión co discurso rupturista: "Hai que combinar ambas as fórmulas. Estou absolutamente de acordo coa mensaxe dura que traslada o noso secretario xeral, e non porque me guste a dureza, senón porque a situación do país é terriblemente dura".

ERREJÓN PIDE MODERACIÓN: "UNHA ALTERNATIVA DE ORDE"

O secretario político de Podemos, Íñigo Errejón, manifestou que a formación morada non será quen de "gañar as eleccións" ata que o conxunto da cidadanía de España os perciba como "unha alternativa de orde".

Así o indicou nunha entrevista ao diario Faro de Vigo recollida por Europa Press, na que o número dous de Podemos defende que ten "diferenzas nalgunhas cuestións" con Pablo Iglesias pero que se gardan "lealdade" mutuamente grazas a que ambos son "honestos" nas súas "conviccións".

"Tócanos a nós demostrar que os verdadeiros antisistema están no goberno e que nós temos unha alternativa de orde. Non imos gañar as eleccións ata que en España se nos imaxine gobernando", resaltou Errejón, que ve en "os concellos do cambio" unha "clave" para "demostrar" á xente "quen" é Podemos.