A campaña de consumo de froita nos colexios incorpora este ano a castaña

A campaña pública para o consumo de froitas frescas nos colexios incluirá este ano como novidade, na lista de produtos subvencionables que poden elixir os colexios, a castaña, a petición da Xunta de Galicia.

A conselleira do Medio Rural, Ángeles Vázquez, e a directora xeral de Gandaría, Belén do Campo, visitaron este mércores o Centro Público Integrado Fonte Díaz, de Touro (A Coruña), con motivo do inicio desta campaña.

A inclusión da castaña como froita subvencionable era unha "petición histórica" por parte da Comunidade ao Goberno central, que este ano aceptou incluíla no real decreto sobre a aplicación en España da normativa da UE en relación aos plans escolares de consumo de froitas, hortalizas e leite.

Vázquez eloxiou esta medida que, ademais de "contribuír a unha alimentación equilibrada", apoia "unha industria en auxe en Galicia" como é a da castaña, do mesmo xeito que ocorre co plan de leite e produtos lácteos nos colexios.

Ao redor de 100 nenos do colexio de Touro participaron nas actividades organizadas dentro desta campaña, como unha zona de debuxo e plastilina, unha área de cociña ou un 'photocall' onde fotografarse con mensaxes sas.

Galicia participou neste plan desde a súa creación en 2009 a través dunha resolución de axudas para cada curso escolar. Cada ano, os centros interesados increméntanse desde os 123 de 2009 ata os 340 da última campaña. No actual curso está previsto superar os 400 centros educativos.

A orde de axudas para executar esta campaña no curso 2016/2017 contou cun orzamento de 317.200 euros, o 75 por cento do Fondo Agrícola de Garantía (Feaga) e o 25 por cento restante abonado pola Xunta.