A nova documentación de Adif obriga a aprazar as comparecencias xudiciais previstas

As comparecencias de dous peritos --os designados por QBE-- e dun catedrático que elaborou un informe para un dos peritos xudiciais na causa polo accidente do tren Alvia en Angrois foron suspendidas de novo polo xuíz tras pedilo algunhas partes ante a nova documentación achegada por Adif.

Algunhas partes reclamaron este novo adiamento para ter tempo para estudar a nova documentación, despois de que o administrador de infraestruturas ferroviarias entregase, este luns, 300 folios sobre avaliación de riscos na liña e cambios significativos de velocidade na rede ferroviaria.

Adif admitiu, nun escrito remitido ao xulgado pola Avogacía do Estado, que esta documentación "relevante" para a instrución xudicial foi omitida no seu día "por erro". Por iso, achegouna este luns, a dous días das comparecencias dos dous peritos da aseguradora de Renfe e do experto ao que pediu un estudo o perito Juan Carlos Carballeira, todos eles centrados, precisamente, na análise de riscos.

Polo momento, segundo informaron fontes do Tribunal Superior de Xustiza de Galicia (TSXG), non hai nova data fixada para que se produza a vista, que xa estaba convocada para o pasado xoves 29.