Os cazadores reclaman vixilancia "disuasoria" nos montes galegos

A Unión de Tecores de Galicia (Unitega) pediu que se incremente o dispositivo de vixilancia disuasoria contra incendios no rural galego ante as previsións meteorolóxicas que "auguran o final das choivas e o regreso do bo tempo" á Comunidade galega durante a próxima semana.

Nun comunicado remitido aos medios este domingo, os cazadores de Unitega reclaman que a Consellería do Medio Rural e as forzas da orde pública aumenten este dispositivo para "evitar que se produza unha nova vaga de incendios" como a sucedida en Ourense.

E é que para Unitega "non sería a primeira vez que estes delincuentes do medio ambiente aproveitan a proximidade dunhas eleccións políticas para crear alarma social mediante numerosos incendios simultáneos, que dificultan enormemente que o dispositivo de extinción os poida atender con eficacia".

Así mesmo, os cazadores lembran que "hai uns días deuse por concluído o dispositivo de vixilancia da 'Operación Sentinela' da Brilat" o que, na súa opinión, "supoñerá unha diminución importante de ollos vixiantes no medio rural". Por iso, consideran necesario que a Administración "actúe con previsión" e busque a maneira de "manter, polo menos, a intensidade de vixilancia disuasoria que se tivo durante os meses de verán".

"Ante unha política preventiva deficiente, non podemos deixar a solución do problema dos incendios só á extinción rápida dos mesmos, senón que debemos facer un importante esforzo na vixilancia disuasoria contra os delincuentes que queiman os nosos montes", subliñou Unitega.