​Extinguidos dous incendios forestais na comarca do Barbanza

Os dous incendios forestais rexistrados na tarde do domingo nos municipios coruñeses de Rianxo e Boiro quedaron extinguidos tras queimar unhas 20 hectáreas, na súa maior parte de arboledo.

Segundo a información facilitada por parte da Consellería do Medio Rural, o incendio de Rianxo comezou ás 13:06 horas do domingo na parroquia de Asados e quedou extinguido pasada a medianoite. A superficie calcinada neste lume forestal situouse nunhas 9,5 hectáreas, a maior parte de arboledo, segundo concretou o departamento de Medio Rural.

Na extinción deste incendio participaron catro axentes forestais, nove brigadas, tres motobombas, cinco helicópteros e dous avións.

Pola súa banda, ás 20:38 horas do domingo quedou extinguido o lume que comezara ás 13:58 horas na parroquia de Lampón no municipio de Boiro, no que arderon unhas 10,2 hectáreas, a maioría de arboledo.

Na extinción deste incendio colaboraron cinco axentes forestais, 10 brigadas, sete motobombas, unha pa, seis helicópteros e catro avións.