As mareas envían mensaxes de unidade mentres buscan a fórmula para elixir o candidato á Xunta

O alcalde de Ferrol, Jorge Suárez (Ferrol en Común), aposta por un candidato de "consenso" elixido por todas as forzas políticas e sectores que participan na confluencia en lugar dunhas primarias para elixir o cabeza de lista á Xunta, co obxectivo de evitar a "confrontación" que pode darse nun proceso dese tipo.

"E no resto da lista, debemos participar todos en igualdade de condicións para acceder a un posto desas candidaturas", considerou, ao ser preguntado este xoves, nunhas declaracións nas que puxo o exemplo de candidato de consenso a Xulio Ferreiro en Marea Atlántica ou Ada Colau en Barcelona.

En canto á elección do candidato para presidir a Xunta "existe certa urxencia en ter un referente de consenso para todos, onde todos poidamos vernos reflectidos e tamén todas as forzas políticas e sociais sentas identificadas". "A partir de aí, iniciar o que sabemos facer, coa elaboración colectiva dun programa político, unha lista de primarias, un código ético e unha actuación transparente para tomar o poder da Xunta de Galicia", explicou.

Pola súa banda, o alcalde de Santiago, Martiño Noriega, coincide co seu homólogo ferrolán en apostar por un candidato que "levante amplo consenso" para as próximas eleccións autonómicas dado o "esquema moi plural" das mareas e volveu a asegurar que a persoa que opte á Xunta determinaráa "o proceso". El, volve descartarse como posible aspirante.

PROBLEMAS INTERNOS

Doutra banda, Suárez afirmou que "se están creando unha serie de polémicas artificiais de distensións internas de En Marea" e que, baixo o seu punto de vista, "parece que hai unha operación de acoso e derriba contra En Marea, Podemos e con todo o que representa o cambio". "Sempre desde o respecto á liberdade de expresión dos medios de comunicación, pero creo que non existen tales tensións", apuntou.

Interpelado sobre se En Marea ten previsto repetir a mesma fórmula de coalición, dixo que "a marca En Marea é válida para construír esa nova iniciativa onde se defendan os intereses das clases populares". "E o que menos importa é o marco xurídico, a formulación e mesmo as candidaturas. O importante é un programa no que esteamos todos e ese será o camiño que Ferrol en Común vai defender", sentenciou.

Sobre o mesmo tema, Noriega augurou que "o que tocará" facer con este espazo "consolidado" de fronte ao futuro" é "amplialo e melloralo". "O que ocorra no futuro terémolo que decidir colectivamente de forma cooperativa entre as diferentes sensibilidades que operan na marea", indicou.

ADIANTO ELECTORAL

A preguntas dos medios de comunicación, Jorge Suárez tamén asegurou que un hipotético adianto electoral lles resulta "indiferente". "Eu creo que En Marea vai continuar subindo, sexan en agosto, setembro, outubro ou novembro, xa que nós temos un proxecto claro e en que as persoas que van ocupar os postos de saída é o menos relevante", defendeu.