​A consellería defende o concerto do centro da Igrexa posto en cuestión en Santiago

(foto: escolascatolicas.es) 

A consellería de Educación saíu ao paso das críticas da CIG-Ensino, defendendo a través dun comunicado o concerto educativo da Casa do Neno, asegurando que responde ás "necesidades educativas" da zona de Santiago onde se atopa.

Asegura que o centro xa ten concedido un informe favorable provisional por parte da Comisión de Valoración, e que a resolución definitiva será publicada xunto co resto dos concertos no DOG entre xuño e xullo.

Dado que é coñecedora da previsión do concerto, xustifica que a Comisión de Escolarización de Santiago "pode xa propoñer a adxudicación de prazas de escolarización nesta área", tendo conta que esta decisión non é firme.

Por iso dende a consellería afirman non entender que "algún sindicato califique de ilegal e fraudulento un proceso que seguiu todos os pasos normativos e que é publico porque nas reunións hai representantes dos propios sindicatos, dos centros, do profesorado e das anpas". 

DENUNCIA DA CIG

A CIG-Ensino denunciara este xoves o que entendía como "unha actuación ilegal e frautulenta" para "crear un centro concertado da Igrexa" en Santiago de Compostela. 

Reprochou á Xunta que "se pliegue a disposición da Igrexa" e propoña concederlle un concerto cando segundo eles a  Administración educativa recoñecera "que non é necesario" por estar "cubertas as necesidades".