Bruselas descarga responsabilidade nos gandeiros para saír da crise do sector lácteo

O comisario de Agricultura e Desenvolvemento Rural, Phil Hogan, descargou este xoves nos gandeiros gran parte da responsabilidade para saír da grave crise do sector lácteo.

No palamento europeo, defendeu a activación da norma da lexislación comunitaria que permite os acordos voluntarios entre gandeiros para reducir a produción, destacando que "pode xogar un papel significativo" para deixar atrás a crise."Está en mans dos gandeiros xuntar as súas forzas e decidir colectivamente reducir a produción", manifestou.

Estas declaracións non convenceron á europarlamentaria de Alternativa Galega de Esquerda (AGE)Lidia Senra, que asegurou que a crise foi provocada polas institucións europeas e "son elas as que teñen que propoñer solucións". "Esta crise responde o abandono das políticas públicas e pon de manifesto que o mercado internacional é un espellismo", apuntou.

Durante a súa quenda de palabra, o socialista José Blancosinalou que na súa comunidade de orixe, Galicia, os prezos pagos non cobren os custos, o que supón "a constatación dun fracaso". "O sector languidece e miles de explotacións en Galicia están en risco de pechar", indicou, antes de instar á Comisión a non "seguir cega" e a "escoitar o clamor do sector".

Por outra banda, o comisario europeo negou que a crise do sector sexa consecuencia da abolición das cotas lácteas. Entende que se trata do resultado dunha "tormenta perfecta", ao coincidir no tempo un incremento da produción global, o veto de Rusia a produtos europeos e unha desaceleración da demanda en China.