Traballo promoverá o cooperativismo no Fórum Gastronómico da Coruña

Flavio Morganti

Santiago, 12 de marzo de 2015.- A Consellería de Traballo e Benestar, a través da Dirección Xeral de Traballo e Economía Social e o Consello Galego de Cooperativas, estará presente no Fórum Gastronómico que terá lugar en ExpoCoruña, entre os días 15 e 17 de marzo. A participación desenvolverase a través dun posto propio onde se informará das potencialidades e solucións que ofrece o cooperativismo como modelo empresarial capaz de manter e crear emprego.

Encargaranse de presentar unha selección dos seus mellores produtos as seguintes entidades cooperativas: Biocoop (carne de tenreira ecolóxica); Monte Cabalar (carne de poldro, chourizo de "porco celta"); Campo Capela (requeixo, queixo e manteiga); Condado Paradanta (queixo e mel); Jesús Nazareno (viño); Adegas Eidosela (viño); Viña Moraima (viño); Virxe das Viñas (viño); Granxa O Cancelo (leite e xeados); Vicogalo (galo celta, pularda celta e ovos); Frugal (froitas deshidratadas); Milhulloa (grelos deshidratados, especias); Pulponor (polbo de lonxa); O Canto da Balea (peixe e marisco) e Artesáns da Pesca (pesca do día).

O cociñeiro Flavio Morganti e a comentarista Sole Felloza amosarán a riqueza gastronómica dos produtos destas entidades dende a filosofía dunha cooperativa. Farano a través dun menú degustación que terá lugar o martes 17 ás 12,30 horas, no que se enxalzará a calidade do produto cooperativo mantendo a base da tradición, pero achegando un punto de innovación.

Neste menú, poderanse degustar pratos como o ourizo de manteiga con tosta de pan negro, chourizo de porco celta e straccitaella de grelos con caldo e ovos de galo celta de Mos; lomiño de xurel de anzol e polbo da costa con patacas e finas herbas da Ulloa; pancha en tempura crocante fina con maionesa de curry; hamburguesiña de tenreira galega con concentración de mencía e cebola agridoce; xeado artesá e escumoso de requeixo con pera, mazá e piña deshidratada e mel; e viños brancos e tintos con denominación de orixe.