​Feijóo pide diálogo sen liñas vermellas con Catalunya: "A lei non pode ser obstáculo para a empatía"

O presidente da Xunta, Alberto Núñez Feijóo, nunha conferencia sobre estabilidade e sustentabilidade no Círculo de Economía de Barcelona, apostou por abordar o encaixe de Catalunya en España a través dun diálogo fluído e sen liñas vermellas: "A lei non pode ser obstáculo para a empatía".

"Debemos desterrar a demonización do que pensa ou sente diferente, é pouco saudable facer exorcismos co nacionalismo catalán", sentenciou Feijóo, que defendeu que Catalunya e Galicia representan dúas identidades que deben ser respectadas no conxunto do Estado.

Destacou que "as inquietudes de Catalunya deben ser respectadas e harmonizadas", sempre dentro do marco da lei e con vocación de recoñecer ás autonomías como núcleo central e non periférico do Estado.

"Non caben liñas vermellas, senón moitos teléfonos vermellos con permanente comunicación", receitou Feijóo, que recoñeceu que a sentenza contra o Estatut marcou un antes e un despois nas relacións entre Catalunya e o resto de España.

"Os moderados dunha e outra parte deben deixar de ser reféns dos grupos que necesitan o conflito para sobrevivir", e a liña divisoria non debe estar entre a esquerda e a dereita nin entre nacionalistas e constitucionalistas, senón entre os que queren seguir no conflito e os que traballan para superalo.

Ao acto asistiron o coordinador xeral do PP catalán, Xavier García Albiol, o líder do partido en Barcelona, Alberto Fernández Díaz, o presidente de Hotusa, Amancio López, o presidente do Banc Sabadell, Josep Oliu, e o expresidente de Gas Natural Fenosa, Salvador Gabarró, entre outros.

RESCATE DO ESTADO DE AUTONOMÍAS

Ao seu xuízo, o primeiro paso para recompoñer as relacións é "liberarse da ditadura das palabras e os conceptos" como dereito a decidir e nación, e centrar esforzos en perfeccionar a distribución competencial e as bases do financiamento.

O mellor para o presidente galego é "rescatar as expresións 'España das autonomías' e 'Estado das autonomías', non para rompelas, senón para cumprilas en toda a súa extensión", nun proceso de descentralización que debe ter en conta a pluralidade española.

Este proceso debe iniciarse cunha reforma de financiamento que "non debe mesturarse co debate identitario" e na que non debe haber o trato bilateral que houbo con Catalunya na configuración do actual sistema, considerou Feijóo.

Aínda así, admitiu que "non é fácil de explicar que a Catalunya non se lle dea un concerto cando o teñen os vascos e os navarros" porque é razoable, aínda que apuntou que, en cambio, a Generalitat si que utiliza o Fondo de Liquidez Autonómico (FLA) mentres outras comunidades, como Galicia, non o fan.

Considera que con este mecanismo a Generalitat estase "sobrefinanciando sen pactalo co resto de comunidades", polo que ve necesario reformar e clarificar canto antes o actual sistema.

ADMIRACIÓN ATA O ESTATUT

Feijóo enxalzou as bondades do catalanismo "que había ata o do Estatut", cando CiU axudaba á gobernabilidade de España e participaba dos grandes pactos de Estado, dixo.

Segundo el, ata entón os galegos admiraban a capacidade xestora de Catalunya, pero co proceso soberanista mudou a situación: "Desde hai algún tempo xa non é o exemplo para seguir".

Cre que "a algúns políticos cataláns gústalles o conflito porque conseguen votos", algo que dubida que sexa útil para os cidadáns, e apunta que o acordo é o desenlace máis intelixente ante calquera conflito ou discusión.

Aínda así, pediu que se respecte e se teña en consideración a maioría independentista que hai no Parlament: "Igual que en Estados Unidos non están todos equivocados, aínda que Trump non nos guste, en Catalunya tampouco, aínda que non nos guste a CUP e ERC".