Doce mil firmas contra o ERE de Extel

O comité de Extel convocou para este mércores na Coruña paros laborais por quenda de traballo en contra do expediente de regulación de emprego (ERE) presentado pola empresa.

En concreto, segundo informou o comité, os traballos de Extel continúan esta semana coas mobilizacións en contra da execución do ERE cun paro laboral de dúas horas por quenda de traballo este mércores día 2.

Pola mañá, o paro será de 11,30 a 13,30 horas e pola tarde de 16,30 a 18,30 horas. Coincidindo coas horas dos paros, o persoal sairá en manifestación desde as oficinas da empresa no Edificio Proa, en Matogrande.

Este luns o comité tiña previsto entregar as case 12.000 firmas recollidas en apoio aos traballadores da empresa "en rexeitamento ao ERE e en protesta pola política de recorte de servizos e deslocalización de Telefónica-Movistar" pero, segundo subliñou, a entrega "non se puido efectivizar" xa que "na tenda á que se dirixiron negáronse a recibir o cartafol coas firmas".

Con todo, o comité afirma que "buscará todas as vías" para que a empresa de telefonía "reciba os escritos" e non descarta remitilas por correo postal ao presidente da compañía.