​O reitor da UDC avoga por unha proba "única e global" para acceder á universidade

O reitor da Universidade da Coruña (UDC), Xulio Abalde, avogou por elaborar entre as universidades galegas e a Xunta unha "proba única" de acceso á universidade, e que sexa "global" e "válida" para todo o sistema universitario español.

Así o manifestou, en rolda de prensa, tras presidir o primeiro Consello de Goberno deste curso académico, no que se aprobou a implantación do voto electrónico como a vía para participar nos procesos electorais da institución.

Preguntado sobre a reunión do Consello de reitores e a súa opinión sobre a reválida, Abalde lembrou a súa postura, que pasa por poñer en marcha unha proba de acceso á universidade que sexa "válida" para todo o sistema universitario español, "non só para o galego".

Así, na súa opinión, as universidades galegas e a Xunta teñen que ser capaces de "elaborar unha proba única que sirva para o acceso ás diferentes titulacións". "Trátase de non modificala moito respecto da actual", puntualiza.

VOTO ELECTRÓNICO

Abalde presidiu este mércores o Consello de Goberno no que se aprobou o novo regulamento electoral da universidade, que busca que todos os seus procedementos realícense só a través do voto electrónico. Desta forma, haberá proceso electorais "con garantías" e con maiores facilidades.

Ademais, entre outros asuntos, a UDC propuxo a Ramón do Val para xerente da institución en substitución de Juan D. Villoslada.