En Marea acaba no grupo confederal

Os deputados asinaron hoxe o acordo. //Fonte: @En_Marea twitter

Os cinco deputados da coalición En Marea (Anova-Podemos-EU) no Congreso rexistraron este xoves a súa incorporación no grupo "confederal" de Unidos Podemos-En Comú Podem, que agora engadirá ao seu nome a marca da confluencia galega, e sumará unha nova portavoz adxunta, a deputada de Anova Alexandra Fernández, que ocupa a Portavocía da coalición galega neste período de sesións.

Segundo explicou Fernández en rolda de prensa no Congreso, En Marea tomou esta decisión ao entender que a súa incorporación no grupo confederal é a mellor forma para garantir a voz e a visibilidade do seu proxecto, despois de que a súa proposta para formar grupo propio fose rexeitada pola Mesa do Congreso.

A outra opción era integrarse no Grupo Mixto, como van facer os deputados de Compromís que tamén viron rexeitada a petición de grupo propio que presentaron xunto aos seus compañeiros da confluencia A la Valenciana --na que tamén se integra Podemos e EUPV--.

AUTONOMÍA DE VOTO

Os cinco deputados galegos que agora se integran no grupo renombrado como Unidos Podemos-En Comú Podem-En Marea asinaron un acordo que recolle, segundo asegurou Fernández, "unha carta cos dereitos" que a Mesa lles negou.

Entre eles está o de poder asistir á Xunta de Portavoces --a través da Portavocía adxunta que ostentará Fernández-- e o de contar con tempo de intervención nos grandes debates, que do mesmo xeito que a anterior lexislatura, dependerá da repartición proporcional que fagan cos representantes do resto de forzas integradas no grupo confederal.

Fernández tamén defendeu que este acordo tamén pasa por manter a súa autonomía de voto para situarse de forma distinta a Unidos Podemos nos casos nos que o consideren necesario, e por xestionar a axenda política que teña que ver coa realidade galega.

IRÁN ATA O CONSTITUCIONAL

Á marxe de integrarse no grupo confederal, En Marea decidiu seguir adiante coa súa petición de grupo propio e recorreu no Congreso a decisión da Mesa de negarllo. De feito, mantén a súa "convicción" de chegar ata o Tribunal Constitucional se o órgano de goberno do Congreso volve rexeitar a súa demanda.

Coa incorporación dos cinco deputados de En Marea e dos cinco da coalición A la Valenciana que non pertencen a Compromís (catro de Podemos e un de EUPV-IU), o grupo confederal de Unidos Podemos-En Comú Podem-En Marea, que ten a Pablo Iglesias como presidente e a Iñigo Errejón como portavoz, sumará 67 membros.