Os primeiros nenos saharauis xa están coas súas familias de acollida

Os primeiros nenos saharauís que este verán pasarán un período de vacacións en Galicia chegaron este sábado pola mañá ao aeroporto de Santiago, Lavacolla, onde os recolleron as familias galegas que os acollerán ata principios de setembro.

Este ano pasarán a época estival en Galicia un total de 325 nenos, dos que ao redor da metade chegaron este sábado, mentres que o resto farano este domingo, 17 de xullo, noutro voo. A continuación, levarán os nenos para pasar as "revisións médicas necesarias", un dos obxectivos desta iniciativa.

Así o indicou a presidenta da asociación Solidariedade Galega co Pobo Saharauí (Sogaps) en Galicia, Maite Isla, quen lembrou que, este ano, o programa tivo "moitos obstáculos económicos" porque, 20 días antes da data de chegada, comunicouse á asociación que debería pagar os billetes de avión dos nenos por adiantado. Como consecuencia, tívose que

pedir un préstamo de 105.000 euros para "poder facer fronte" a esta situación.

Ademais, explicou que, mediante esta iniciativa, tamén se busca unha "sensibilización política" respecto da ocupación do Sahara Occidental. Neste sentido, o delegado saharauí para Galicia, Emboiric Mohamed, sinalou que máis aló de que estes nenos pasen dous meses en Galicia, considera que se necesita unha solución política para mellorar a súa situación.

Así, Mohamed afirmou que España ten a "responsabilidade" de apoiar a descolonización do Sahara Occidental para que finalice o "máis pronto posible".

COMPROMISO DA XUNTA E PARLAMENTO

Mentres, o conselleiro de Sanidade, Jesús Vázquez Almuiña, eloxiou o labor da asociación e reiterou o compromiso da Xunta para prestar o servizo sanitario necesario aos nenos.

Ademais, explicou que esta iniciativa de acollida permite mostrar un "apoio" de Europa ao pobo saharauí e que os participantes poidan "coñecer outra cultura".

A deputada do BNG Montse Prado valorou que se puido desenvolver esta acción a pesar dos problemas económicos grazas ao labor da asociación e destacou a importancia de que estes nenos poidan evitar o "clima extremo" e as "condicións duras" que viven no seu país, "polo menos durante dous meses". Ademais, á recepción dos nenos tamén acudiu o deputado do PP Gonzalo Trenor.

PRAIA E FACER DEPORTE

Respecto ao programa, dúas nenas saharauís que participaron na iniciativa en máis ocasións, Magali e Laha, explicaron que o que máis lles gusta de pasar o verán en Galicia é "pasear" e facer deporte coas súas familias de acollida, actividades que realizarán de novo este ano.

Pola súa banda, outra das nenas, Fatimetou, indicou que prefire gozar a súa estancia na "praia ou a piscina" e asegurou que estes días estaba ansiosa por vir a Galicia.