​Deteñen un coruñés por vender medicamentos ilegais na rede

Axentes da Policía Nacional detiveron un home na Coruña pola venda ilegal de medicamentos a través de Internet, segundo informa a Xefatura Superior de Policía en Galicia.

No seu domicilio, "nunha pequena localidade da Coruña", segundo precisa a Policía Nacional, tamén almacenaba sustancias depresoras, estupefacientes e potenciadores para a disfunción eréctil, todas elas listas para a súa distribución.

En concreto, sinala que o detido chegou a utilizar ata dez contas de correo electrónico co obxectivo de multiplicar o número dos seus anuncios e dificultar o seu posible rastrexo. Ademais, compraba os medicamentos a través de páxinas web fóra de España utilizando técnicas de ocultación tales como a utilización da rede de anonimato TOR ou o uso de moeda virtual Bitcoin.

MEDICAMENTOS PARA O SOBREPESO

A operación iniciouse cando os investigadores detectaron multitude de anuncios online nos que se ofrecían medicamentos para combater o sobrepeso e cuxa venda se atopa prohibida en España.

Tras analizar esta información, así como os correos electrónicos empregados para a súa publicación e as distintas direccións IP para a súa inserción, os axentes lograron determinar a relación dos envíos que o investigado realizara en todo o territorio nacional.

Unha vez obtida toda esta información, procederon á detención do investigado por un delito contra a saúde pública, así como á entrada e rexistro no seu domicilio, onde comprobaron que os medicamentos eran comprados en varias páxinas da internet estranxeiras.

DISTRIBUCIÓN

Ademais dos medicamentos que tiña á venda, o arrestado tamén almacenaba no seu domicilio, listos para ser distribuídos, outros para combater a disfunción eréctil cuxa venda en España se atopa regulada baixo prescrición médica, así como medicamentos depresores do sistema nervioso e sustancias estupefacientes.

Igualmente, no rexistro, os axentes tamén localizaron gran cantidade de material para o envío de pedidos, así como listas de usuarios e documentación relacionada con envíos e cobros postais.

A operación foi desenvolvida por axentes da Brigada Central de Investigación Tecnolóxica, pertencente á Comisaría Xeral de Policía Xudicial, coa colaboración da Brigada Local de Policía Xudicial de Santiago de Compostela.