Dous accidentes en Arteixo e Santa Comba deixan cadanseu ferido

Unha persoa resultou ferida nun accidente de tráfico con catro vehículos implicados nunha colisión rexistrada no termo municipal de Arteixo (A Coruña).

O sinistro sucedeu sobre as 19,00 horas do martes na Avenida da Pastoriza e como consecuencia do impacto unha persoa resultou ferida de carácter leve, segundo informou o 112 Galicia.

Foi un particular o que informou dos feitos ao 112 Galicia ás 19,00 horas do martes. Segundo o seu relato, dentro dos vehículos implicados había varias persoas atrapadas.

Con estes datos, o persoal do CAE 112 Galicia alertou aos Bombeiros de Arteixo, que se desprazaron ao momento cun equipo de excarceración, pero finalmente todos os ocupantes dos coches saíron polo seu propio pé.

Por parte da central de emerxencias tamén se explicou os feitos a Urxencias Sanitarias, a Protección Civil e á Policía Local.

SANTA COMBA

Unha persoa resultou ferida nun accidente de tráfico rexistrado na noite do martes ao envorcar un vehículo na parroquia de Fontecada no municipio coruñés de Santa Comba.

Segundo informaron os Bombeiros de Santa Comba, ás 21,14 horas do martes recibiron a chamada do 112 Galicia na que informaba dun vehículo envorcado en Barbeira.

Os bombeiros mobilizaron dous vehículos, ao indicarlles en primeira instancia que podía haber persoas atrapadas no vehículo sinistrado. Ao chegar ao lugar constataron que non había ninguén atrapado, polo que unicamente procederon a sinalizar a zona do accidente mentres os técnicos sanitarios atendían á vítima e a trasladaban á ambulancia.