​O Materno-Infantil da Coruña segue sen oficina de atención ao paciente

Dous anos despois da primeira petición ao respecto, o Hospital Materno-Infantil da Coruña segue sen abrir a Oficina de atención ao paciente e a Xerencia non responde ás solicitudes presentadas pola Coordinadora Anti-Privatización da sanidade Pública.

Así o asegura a plataforma nun comunicado, que lamenta os atrancos que esta ausencia provoca á hora de presentar calquera queixa. No escrito, afirman que, no 2015, nunha charla coa subdirectora de Atención ao Paciente, a doutora Olveira Lorenzo, lles manifestou que "estaban a formar unha persoa para esa oficina e que non se esquecían das peticións".

"Tras máis dun ano de espera, a oficina segue pechada", aseguran. Polo tanto, cren que "non nos deixan outra saída" ca pensar que esas palabras "foron algo para salvar a situación nese momento". E lamentan que non se escoitasen tampouco as peticións feitas en abril de 2015 e 2016 no mesmo sentido, "acompañadas de centos de firmas de doentes".

Con todo, esixen á Xerencia do CHUAC que "cambie de actitude e escoite á cidadanía" en lugar de dar o silencio por resposta.