​Rajoy: "Alberto Núñez volverá ser presidente"

Mariano Rajoy cre que Alberto Núñez Feijóo volverá presidir Galicia tras as eleccións do próximo 25 de setembro. E é que sostén o candidato do PP á Presidencia do Goberno que en Galicia "fixéronse ben as cousas", "creceuse moito" e "creouse emprego".

Con todo, recoñeceu, en declaracións aos medios tras finalizar o seu paseo pola Ruta da Pedra e da Auga, que "aínda quedan moitas cousas pendentes", aínda que considera, "sinceramente", que "non hai cor" entre o resto de candidaturas que se presentan aos comicios galegos e a oferta dos populares: "Alberto Núñez volverá ser presidente".

TERCEIRAS ELECCIÓNS

Nos seus días de retiro vacacional Rajoy insiste na súa chamada para a investidura. Espera que non se produzan unhas terceiras eleccións porque, ao seu xuízo, "sería unha magnífica forma de que fixésemos o ridículo todos".

"Desde logo, o Partido Popular, que é quen gañou as eleccións, vai ter unha postura construtiva, pero os demais, aínda que as perderan, tamén teñen que ter unha postura construtiva". E é que sostén o candidato do Partido Popular á Presidencia do Goberno que, doutro xeito "é imposible facer algo razoable".

Así mesmo, asegurou que el non lle vai a "pedir nada a ninguén", xa que entende que "todo o mundo ten o coñecemento suficiente para saber o que se necesita en España nestes momentos". "O peor é que non se poida formar goberno e que teñamos que ir a unhas terceiras eleccións a finais de decembro", sinalou.

É máis, argumentou que, no caso de que ocorrese isto, atrasaríase " todo", o "crédito exterior" de España "veríase moi danado", non se poderían aprobar os Orzamentos Xerais do Estado (PGE), a economía veríase "afectada" e, en consecuencia, a "forma de vivir dos españois". "Eu espero que todo o mundo actúe con sensatez", finalizou en alusión ao resto de partidos políticos.