Galego
Detido en Ourense un home fuxido da xustiza con catro ordes de ingreso en prisión
Levaba enriba unha identificación falsa cando o parou a Policía Nacional. Despois dun ano esquivándoo, xa está no cárcere.
A Policía Nacional detivo en Ourense un home de 46 anos condenado por numerosos procedementos penais e sobre o que pesaba un total de 13 ordes xudiciais, todas elas en vigor, das que catro eran de ingreso en prisión.
Segundo apuntou o corpo, o home, de etnia xitana, atopábase indocumentado e achegou nun primeiro momento datos de identificación falsos. A súa actitude "esquiva" e a "incongruencia das súas explicacións" aos axentes da Unidade de Prevención e Reacción, determinou que fose trasladado á Comisaría para a súa plena identificación.
Unha vez acreditada a súa identidade, procedeuse á comprobación de todas as ordes de procura xudiciais que figuraban en vigor contra el e determinouse que levaba fuxido da xustiza desde hai un ano.
Entre outras, pesaban sobre o home catro ordes de detención e ingreso en prisión, tres de detención e personación e varias de investigación de domicilio e paradoiro, todas elas en relación con procedementos penais por delitos contra a propiedade. Por todo iso, foi ingresado no Centro Penal de Pereiro de Aguiar.
Escribe tu comentario