Bascuas ve "posibilidades serias" de crear unha marea galega para as xerais e lamenta que Podemos o dificulte

O secretario xeral de Compromiso por Galicia (CxG), Xoán Báscuas, considerou que existen "posibilidades reais" de crear unha marea galega para as eleccións xerais e lamentou que Podemos intente "facer prevalecer as siglas do seu partido" ao considerar que "dificulta o camiño cara á configuración dunha candidatura conxunta".

Deste modo, pronunciouse nunha entrevista concedida á Radio Galega que recolle Europa Press, na que o líder de Compromiso por Galicia considerou que, aínda que o interese de Podemos por manter a súa marca "sexa unha dificultade", non cre que sexa o "principal atranco" para lograr este fin.

Así mesmo, preguntado polo encontro que a súa formación mantivo recentemente con dirixentes do BNG para abordar esta posible candidatura, explicou que constatou un interese mutuo por camiñar cara a "plataforma de adscrición individual". "Tanto o BNG como nós queremos ir cara a unha plataforma de adscrición individual na que desexamos atopar con Podemos, Anova e Esquerda Unida, sinalou.

Con todo, Xoán Bascuas recoñeceu que Esquerda Unida aínda non respondeu á solicitude realizada pola súa formación para manter un encontro para analizar esta posible candidatura conxunta.

Por último, o secretario xeral de CxG deixou claro que os partidos políticos "alentarán" esta plataforma pero "pasarán a ter nela unha posición secundaria" xa que "non estarán presentes como tal".