Promover o coche eléctrico en Galicia, entre as propostas de CxG para o 25S
sábado, 27 de agosto de 2016, 17:06
O candidato á Presidencia da Xunta de Compromiso por Galicia (CxG), Xoán Bascuas, apostou por "abaratar" o custo da enerxía eléctrica industrial na comunidade e defendeu un autogoberno fiscal xa que, na súa opinión, é necesario para garantir un "autogoberno político".
Así o sinalou este sábado en Santiago nunha rolda de prensa, na que presentou a candidatura da súa formación política na que el mesmo será o 'número 1' pola provincia da Coruña.
Na súa intervención, Bascuas reclamou que os recursos de Galicia se xestionen en Galicia, e non en Madrid: “As grandes productoras de enerxía están pagando impostos en Madrid e Madrid está sacando rédito dos recursos naturais de Galicia, que de dereito lle corresponden aos galegos”.
Incidíu na necesidade que temos os galegos de reclamar os nosos recursos. “A enerxía producida por Galicia, que sería de baixo custo para o consumidor en Galicia, podería abastecer as futuras electrolineiras que CxG quere repartir por toda a economía galega para fomentar o paso ao coche híbrido ou eléctrico, que non só non contamina, senón que sería de baixo custo para os galegos.
PROPOSTAS ELECTORAIS
Neste contexto, Bascuas instou aos "galeguistas" de "todas as cores" e aos "socialistas" de "bo corazón" a participar no proxecto deste partido no que, na súa opinión, "todos se poden recoñecer".
Afirmou que Galicia é un edificio que precisa de "unha obra nova" que se debe "comezar a construír xa" e non só dun cambio do xefe de obra.
Ante esta situación, presentou á súa formación política como a que "coñece as carencias" e as "múltiples potencialidades" da comunidade. Como exemplo, criticou que Galicia sexa a comunidade autónoma que recibe o "maior impacto económico e paisaxístico" derivado a produción enerxética, mentres que non goza dun abaratamento do prezo.
Así mesmo, sinalou que a Comunidade galega "necesita" un goberno que "dea a cara" polos traballadores do cerco en cuestións como a repartición das cotas, por exemplo a da anchoa, e apostou por un autogoberno fiscal.